34. Plattdütscher Stammdisch bi „Bürger für Schwaan“
An 23.Oktober- Wienmaand - wedder eins een Dunnersdag, pünktlich Klock half söben wier dat wedder eins so wiet. Wi sedden wedder in uns Begegnungsstätt` in de Möhlenstraat, an unsen plattdütschen Stammdisch. Dat letz Mol sedden wi ja bi Svenni up de Kutsch, awer nu wieren wi wedder to Hus.
Ditmol wier allens anders, denn wi harren Besök von den bekannten Filmdreiher Ingo Braun. De hett nählich een Film dreiht, över Wiendörp, wieldess de in`t next Johr 670 Johr alt warden. Ick wull seggen, dat Dörp ward 670 Johr old.
Nu künn he awer keinein nich finn`, de em in plattdütsch wat verkloren künn, un so kem he to uns un wi hemm em holpen. Ilona un Korl hem denn dor wat in de Kamera vertellt und wat dor rutkem dat hett Ingo uns nu vörführt.
Los geiht de Film mit Drohnenbilders, wo de von baben över dat Dörp fleigen deiht un Billers mogt. (Hüt to dags möst wohl vörnweg ne Genehmigung von Pistorius hemm)
Achteran giwt dat een Grußwort von Bürgermeister, nich von dunnemals, nee von den, de hüt dat Amt innehett…und denn geiht los mit de Geschicht.
In sössten Jahrhunnert treckten de Germanen weg un de Slawen kemen, de Obotriten.
Fürst Niklot harr ja een von sine dree Burgen in Werle und up een Barg bi uns Heilstätt Waldeck is ja ok hüt noch de Obotritenhöh` un von dor kannst bit Wiendörp un fast bit nah Rostock kieken, wenn`t gaud Weder is. Den Fürst hemm ja denn Soldatens von Heinrich den Löwen dodhaut und denn würr Mecklenbörg christlich.
In 13. Jahrhunnert würr denn Mecklenbörg besiedelt und nu wieren se dor, de Mecklenbörgers, trinkfest, arbeitswütig und mulful.
1356 is de Wiendörp dat ierst mal in dat mecklenburgische Urkundenbuch erwähnt un von dor an harr`n de Schwaaners de Wiendörper`s an de Back. 1360 sall`n se denn all anfungen hemm de Kark to bugen, mit de iersten Wiendörper Tegels.
Männig bekannte Schwaaners und Wiendörper`s vertellten denn över de Geschicht un wat se so beläwt hemm. Fritz Wolbring und fritz Luckmann kemen to Wurt und Walter Kleinfeld. De Amtsziegel von Schwaaner Amt kemen von de Tegelie König, denn dor hemmse Muertegels und ok Dackpannen brennt. Franz Bunke hett in Wiendörp ok all Billers malt….ja Wiendörp hett schon ne grote Vergangenheit …un ne grote Tokunft.
Bloß den Dörpkrauch, denn hemm se taumokt un afschloten,
Dorbi hett min Fründ Jochen Pupp mi secht: „In jedet Dörp wo ne Kark is, dor is ok een Kraug!“ – und dat hev ick mi markt. So, nu is naug vertellt.
Wenn ji denn Film ankieken willt, in Januar ward de zeigt und achteran kann man em för
5 Euros (ick wull all Mark schriewen) köpen. So wier ok disse Abend an unsen Stammdisch fix vörbi.
Uns next Stammdisch is denn an 20.November (Nevelmaand), Dunnersdag half söben. Denn willen wi över`n Dokter und den Tendokter schnacken.
Bis dorhen -
Hold juch fuchtig
Ilona und Korl
Kommentar schreiben